6 orða skáldsagan

Fréttablaðið hefur verið með úttekt á Íslensku skáldsögunni undanfarna sunnudaga, spurt þar rithöfunda um tilvist bóka og kreppu þeirra. Og fleira. Í framhjáhlaupi eru rithöfundarnir beðnir um að feta í fótspor Ernest Hemingway sem skrifaði eitt sinn sex orða skáldsögu. Sögu sem hann taldi víst seinna vera eitt af sínum bestu verkum. Skáldsagan stutta hljómaði svona:

Baby shoes. For sale. Never used.

Ekki nein barnsspor að feta í enda vel samið. 6 orð sem segja heila sögu, eða allt að því. Orð sem skilja eftir rými til að hugsa lengra og hugmyndaflugið er málað fyrir allt litrófið.

Ég hef lesið öll viðtölin en þetta með sex orða skáldsöguna sat helst í mér. Frábær hugmynd í rauninni. Ég er meira að segja búinn að prófa mig áfram og komist að því að þetta er snúið, ekkert gefið hér. Hættan er sú að semja ljóð í stað skáldsögu, kasta fram heimspekipælingu eða segja frá því hvað sagan var um – en ekki segja söguna um leið og hún gerist. Og svo þarf hún auðvitað að vera 6 orð. Ekki fimm, ekki 7.

Allavega. Ef einhver er ennþá að rata hingað inn þá skora ég á hann – eða hana, að skilja eftir í kommenti, sína sex orða skáldsögu.

Fyrsta færsla (og kannski sú eina?) að lokum:


Líf hans var tíðindalaust með öllu