Chris de Burgh festir kaup á geimveru

Stundum rekur lítil lína upp stór augu hjá manni. Rakst á þessa fyrirsögn inni á mbl.is og varð að smella á. Þetta varð ég að lesa. Chris de Burgh festir kaup á geimveru! Þvílík snilld.

Chris de Burgh er fagmaðurinn sem söng Lady in red og aðra flauelsmjúka og seiðandi lagastúfa sem þekktir eru. Fyrir þá sem ekki muna eftir honum þá lítur hann svolítið út eins og Dudley Moore, pínulítill og með sítt að aftan. Nettur.

Ég las s.s. fyrirsögnina og bjóst við að lesa um nýja landvinninga Krissa á nýjum vettvangi. Bjóst allt eins við því að sjá hann dúðaðan inn í geimbúning haldandi utanm græna undarlega veru klædda í rauðan kjól. Krissi eignast geimveru. Snilldarfrétt sem að sjálfsögðu rataði inn á mbl.is.

Hefði líka verið skemmtilegt ef fyrirsögnin hefði hljóðað einhvern veginn þannig; Geimvera festir kaup á plötu eftir Chris de Burgh en veit að það hefði verið of ótrúlegt og óraunverulegt.

Hún hefði líklega aldrei keypt plötu með Chris de Burgh.