Hummel >>>>

Það er sumt í þessum heimi, dönskum eða öðrum sem ekki má hafa í flimtingum, hendur í eða fótum troða. Sum lögmál eru náttúrunnar og önnur mál ættu að fylgja þeim – enda alveg jafn mikilvæg. Ögn af dönsku stolti mínu fauk út í mitt prívat-a Kattegat heima í stofu í fyrra kvöld.

Ofur kurteis íþróttamaður Rúv, Þorsteinn Brynjólfur Brynjólfsson lýsti á afar næman og nærgætinn hátt mörkum Evrópuleikja fyrr um kvöldið í íþróttaþætti kvöldsins. Það var komið að því að sýna frá leik Danmerkur og Tyrklands og ég færðist fram á sófabrúnina. Ég lagðist þó fljótt aftur á rauða sófabakið, yggldbrýndur, opinmynntur og með krosslagðar hendur. Ingibjörg var að segja mér frá einhverju sem henni lá á hjarta en ég starði bara inn í sjónvarpsskjáinn án þess að veita því nokkra athygli. Eftir nokkra stund gat ég aðeins stunið upp, Sástu dönsku búningana? Ingibjörg svaraði mér auðvitað ekki enda hefði ég líklega ekki veitt því eftirtekt heldur. Neeeeeeeeeeeee hugsaði ég, for helvede! Ég hafði svo sem heyrt áður að þetta stæði til en hafði gleymt því aftur. Glottandi hristi ég bara hausinn þá í barnalegri trú um að sumir danskir hlutir væru danskari en aðrir. Í augum Dana eins og mínum sem horfðu á úr fjarlægri ís-eyjunni.

Danska landsliðið í fótbolta var í rauðum búningi að vanda en í þetta sinn lágu rendurnar langsum niður eftir ermunum á alveg ótrúlega óviðeigandi hátt. Hvergi bar á skástrikum og gömul minning um slæmar fréttir varð kristalklær á ný. Danska landsliðið var ekki lengur í dönskum Hummel búningum heldur hafði það skipti yfir í Adidas. Frá því ég var lítill polli man ég eftir Hummel klæddum frændum mínum í þægilegum stellingum á hverju götuhorni, enda Hummel fötin jafn kósí og danskur hugsunarhátturinn. Landsliðin hafa alltaf leikið þetta dönskum almúga eftir og því hélt ég að danskt Hummel og danskur bolti væri samasemmerki um danskt flaggskip.

But nú ist das öld allt anderes. Þýskt Adidas. Ussussuss. Ef þeir vildu endilega skipta þá hefði verið nær að skipta yfir í hið séríslenska Henson sem þó er sprottið upp úr gömlu dönsku lénsveldi. Í staðinn hafði hersetu og landnámi seinni heimsstyrjaldar verið sópað undir gleymskuteppið og merkið með strípunum þremur merkt sópinum. Ussussuss. Æji segi svona. Þýski hlutinn er auðvitað ekki aðalatriðið hér heldur það að Hummelið þykir ekki kósí lengur og það finnst mér mjög trist. Fyrir mér er Hummel nefnilega jafn danskt og Kim Larsen, konungsfjölskyldan, rauð pulsa á bakka með tveimur litlum brauðum, grænn öl á Strikinu, Ove sprogö og Olsen bandið, Preben elkjær larsen og rifnu stuttbuxurnar ´84, Sjúbbidúa, æðisköst Önju Andersen, smurða brauðið og beikonið. Já meira að segja jafn danskt og huggulegheitin. Helvíti kósí.

Í fyrrakvöld fann ég agnarlítið brot af hálfdanska hjarta mínu brotna eins stökkt beikon.

Danskt að sjálfsögðu.