Ákvörðun

Ákvörðun um eitt - eða annað. 1. mars nálgast eins og óð fluga á bjartri glerrúðu og heimtar frá manni. Ákvörðun.

Og ég í hugsunarferli, veit ekki í hvorn fótinn eigi að stíga - hvort eigi yfirleitt að stíga. Skrefið. Held samt að það sé kominn tími á það. Smá rölt um víðar lendur heims og fræða.

Bara ef tækifærin væru fá og lokuð ofan ofurlítilli krukku sem auðvelt væri að opna með lausum snúningi - réttsælis.

Þó ekki kvörtunarefni í sjálfu sér að tækifæri liggi í haug, þvert um sjálf sig líkt og í risastórri súpuskál. Ilmandi, rjúkandi. Og ég þarf bara að taka skeið í hönd, dýfa í og fanga það rétta.

Væri auðvelt ef það væri ekki líka spurning um það hvort nota eigi vinstri eða hægri höndina.

Endalausar spurningar, fleiri svör. En vantar bara eitt.

Bara eitt.