Kokteill daganna

Mikið hrikalega er Little Trip To Heaven lagið með Mugison gott. Himneskt kannski bara. Gamalt lag með Tom Waits sem ég man ekki eftir en hef líklega þó heyrt áður – enda átti Bjöggi vinur minn alla diskana. Sagði okkur góða sögu af því þegar hann hitti Baltasar á Kaffibarnum eftir að hafa ný-heyrt að hann ætlaði að gera mynd sem héti LTTH. Bjöggi hafði þá sagt Baltasar að hann yrði bara að nota lag með sama titli eftir Tom Waits. Kom á daginn að þetta var uppáhaldslag Balta og hugmyndinni hafði þegar skotið rótum. Samt. Bjöggi á sinn þátt í þessu. Lúkas litli er líka hrifinn af laginu. Var allur á iði þar til ég setti lagið undir geislann. Lagði sig þá rólega í fang föðurs síns og hlustaði með. Brosti. “Thanking my lucky stars that I found you”.

Í gær kl. 9 um morgunn, rétt eftir að ég var lagður af stað í vinnu, bönkuðu iðnaðarmenn á útidyrnar. Buðu Ingibjörgu eitt stykki “ljósleiðara”! Hvorki meira né minna. Hún þáði það, bauð þeim inn og þeir settu ljósleiðara í íbúðina. Inn í fataskápinn! Ekki veit ég hver bað þá um að koma, til hvers þessi ljósleiðari er eða hvað í anskd hann er að gera í fataskápnum okkar. En hann er kominn og ég bíð nú spenntur eftir því að hann fari að sinna sínu hlutverki.

Annars hefur hitinn verið bærilegur þessa vikuna. Til staðar en ekki óbærilegur. Sá litli er þó lítill – í sér, hóstar og sígur nef. Hálfómögulegur greyið. Foreldrarnir hálfómögulegir til stuðnings. Ástand.

Stefnir í endurfundi grunnskólans við Lækinn. Á fundi undirbúningsnefndar á hafnfirska Súfistanum á fimmtudag, var það rifjað upp að hópurinn var nú kannski ekki sá samheldnasti – og ekki víst að allir væru til í að mæta. Man að krakkarnir voru annað hvort ofan á eða undir þarna í denn. Svolítið þannig. Og stundum urðu þeir sem voru ofan á - undir á endanum. Stundum þannig. En hlakka til fundar með fólkinu sem maður hefur gleymt, ekki séð lengi eða jafnvel aldrei þekkt.

Laugardagur og birtan fyrir utan gluggann vegur fullkomlega upp á móti janúar skammdeginu - í hressandi kokteil af hvítum snjó og batnandi heilsu.