Lókal fréttayfirlit

Hlustaði á fréttayfirlit á Rás 2 í gær og bar þar margt á góma. Hamfarirnar í mið-Asíu, niðurstöður skoðanakannana um álit þjóða á Jesús og sigur (loksins) Júsenko í Úkraínu. Fréttamaður geymdi þó gullmolann þar til í lokin og skaut honum inn mjög snögglega. ,,... og Kiefer Sutherland er í bænum. ... Spáð er góðu veðri...”. Svo mörg voru þau orð.

Kiefer Sutherland er í bænum.

Bara sí svona, rétt eins og ekkert væri eðlilegra. Skemmtilegt.

En hvað svo? Hvernig átti ég að vinna út úr þessum upplýsingum? Ég var algjörlega skilinn eftir í lausu lofti. Nú hlustaði ég bara á fréttayfirlitið og heyrði því ekki sjálfa fréttina um Kiefer og get því aðeins giskað á að hún hafi hljómað einhver veginn þannig;

* Kiefer Sutherland er í bænum. Ekki undir nokkrum kringumstæðum segja honum að pabbi hans sé betri leikari en hann.

Eða

* Kiefer Sutherland er í bænum. Dvelur aðeins í 24 tíma.

Eða

* Kiefer Sutherland er í bænum. Stefnir á rúnt upp í sveit á morgun.

Eða kannski bara

* Kiefer Sutherland er í bænum. ... Í fréttum var annars þetta helst.

Mest kúl þannig. Ekkert meir.

Spurning. Veit ekki hvernig framhaldið var. Missti af fréttinni.


Lókal húmor eða bara lókal?